Il Chor viril Lumnezia ei vegnius fundaus 1938. El meina vinavon la tradiziun musicala dalla Ligia da Porclas fundada 1867 e dalla Ligia dil Glogn ch’ei separada 1900 dalla Ligia da Porclas. Igl excellent chor laic dumbra actualmein rodund 70 commembers che derivan per gronda part ord la vischnaunca Lumnezia ni ein attaschai Lumnezians che vivan ordeifer la val. Da 2004 – 2015 ei la direcziun musicala dil chor els mauns dil giuven musicist da professiun Clau Scherrer. El ei pér il 5avel dirigent ella historia dil chor che ha saviu festivar 2008 siu 70avel anniversari. Dau tempra musicala al chor da vallada han cunzun era ils anteriurs dirigents Gion Giusep Derungs (1905-1991) che ha dirigiu 29 onns il chor e da Marcus Zarn che ha smenau 27 onns la bitgetta. Ulteriurs dirigents ein Murezi Elvedi ed Armin Caduff stai.
Il Chor viril Lumnezia tgira cun predilecziun la canzun populara romontscha, denton era cumposiziuns da cumponists da renum internaziunal figureschan sil program da concert da quei chor ch’ei enconuschents lunsch sur las scheinas romontschas ora. Sut la direcziun da Clau Scherrer ha il chor era ughegiau d’interpretar ovras pli pretensiusas da cumponists contemporans. Ils concerts annuals e la participaziun a fiastas da cant districtualas, cantunalas e federalas fuorman ils puncts culminonts dall’activitad musicala dil chor. Sco bien ambassadur dil lungatg e dalla cultura romontscha ha il Chor viril Lumnezia adina puspei la cuida da representar la Romontschia tier arranschaments naziunals. Aschia ei il Chor viril Lumnezia sepresentaus 2001 alla gala dils chors svizzers Chorama ella «Tonhalle» a Turitg, 2002 a CHorfoederation.02 alla Expo 02 ad Yverdon, 2004 al Concert da Nadal SSR SRG idée suisse ella catedrala da S. Gagl e 2007 al Concert da giubileum da 30 onns Uniun svizra da chors el center da cultura e congress ad Aarau.
Il Chor viril Lumnezia ha registrau la platta sonora «Lumnezia sonora» ed ils discs cumpacts «Ei catscha gis» e «Viers mesanotg/ Nordlichter» ch’ei vegnius realisaus ensemen cul cantus firmus surselva.

La primavera 2010 han il Chor viril Lumnezia e la Ligia Grischa presentau communablamein il requiem da Cherubini ed il Veni Creator da Peter Appenzeller (premaudiziun). Ils concerts han giu liug a Cuera ella baselgia da S. Martin ed a Turitg ella «Tonhalle». Plinavon ha il Chor Viril Lumnezia era collaborau al concert da gala dalla fiasta da cant federala a Meringen.

Sco successur da Clau Scherrer ha il chor saviu engaschar Retus Giger. El diregia il chor dapi 2016.